Xəbərlər arxivi

31 May 2018

Meksika Neft İnstitutu SOCAR-la perspektivli əməkdaşlıq istiqamətlərini müzakirə etdi

+

Mayın 31-də SOCAR prezidenti Rövnəq Abdullayev 25-ci Beynəlxalq Xəzər Neft və Qaz sərgi və konfransı çərçivəsində Bakıda səfərdə olan Meksika Neft İnstitutunun baş direktoru Ernesto Rios Patronun başçılıq etdiyi nümayəndə heyətini qəbul etmişdir. Görüşdə Azərbaycan və Meksika neftçiləri arasında əməkdaşlıq perspektivləri nəzərdən keçirilib. Bildirilmişdir ki, Meksika Neft İnstitutu uzun illərdir ki, köhnəlmiş yataqların işlənməsi və bu yataqlarda hasilatın sabit saxlanılması istiqamətində elmi araşdırmalar həyata keçirir. Hasilatda neftvermə əmsalının artırılması Azərbaycanda uzun illərdir istismar edilən yataqlarda hasilatın sabit saxlanılması baxımından həmçinin böyük önəm kəsb edir. Görüşdə SOCAR-ın Bakı Ali Neft Məktəbi ilə əməkdaşlığın qurulması, həmçinin SOCAR-ın təlim mərkəzlərinin fəaliyyətində müxtəlif əməkdaşlıq imkanlarından, o cümlədən hasilat və emal sənayesi üçün operatorların sertifikatlaşdırılması haqqında söhbət açılmışdır. Tərəflər akademik hərəkətlilik, təcrübə mübadiləsi və birgə tədqiqatların həyata keçirilməsi üçün əməkdaşlıq yollarının qurulmasını vacib hesab ediblər.

Xatırladaq ki, 1965-ci ildə yaradılmış Meksika Neft İnstitutu neft sənayesi ilə bağlı fəaliyyət göstərən tədqiqat mərkəzidir. Əsas fəaliyyət sahəsi: texnoloji tədqiqat və inkişaf (R&D), mühəndislik və texniki xidmət, tədris və təlimlərin keçirilməsi (treyninq), texnoloji tədqiqat və inkişaf nəticələrinin kommersiyalaşdırılması, strateji və texnoloji birgə müəssisələrdə iştirak. Məramı - neft sənayesinin inkişafına töhfə verən texnologiya və xidmətlərlə dünya səviyyəli bir ictimai araşdırma mərkəzi olmaqdır. Meksika Neft İnstitutu hazırda Pemex şirkəti ilə sinerji yaradıb.

31 May 2018

SOCAR İndoneziyanın “Pertamina” şirkəti ilə əməkdaşlıq məsələlərini müzakirə etdi

+

Mayın 31-də SOCAR prezidenti Rövnəq Abdullayev İndoneziyanın “Pertamina” şirkətinin planlama, investisiya və risk menecmenti üzrə direktoru Gigih Prakosonun rəhbərlik etdiyi nümayəndə heyəti ilə görüşmüşdür. Hazırda Pertamina şirkəti SOCAR Trading ilə neftin alğı-satqısı sahəsində əməkdaşlıq edir və bu əməkdaşlığı daha da genişləndirməyə maraqlıdır. Bununla yanaşı Pertamina şirkəti həm hasilat, həm də emal sahələrində birgə əməliyyatlara maraq göstərir. Azərbaycan və İndoneziyada neftin satışı, hasilat və emal sahələrində gerçəkləşdirilən layihələr çərçivəsində əməkdaşlıq imkanlarının araşdırılması üçün işçi qrupu tərəfindən müvafiq araşdırma və təhlillər aparılacaq.

İndoneziya bazarı SOCAR Trading-in əməliyyatları arasında xüsusi əhəmiyyət kəsb edir. Hazırda İndoneziyanın idxal etdiyi neftin 8%-i SOCAR-ın payına düşür. 10 il əvvəl SOCAR Trading-in “Azeri light” brendi ilə daxil olduğu İndoneziya bazarının perspektivliyi və bazarda Azərbaycan neftinə olan tələbat artan xətt üzrə inkişaf etməkdədir.

31 May 2018

“SOCAR Trading”in rəhbərliyində dəyişiklik olub

+

“SOCAR Trading”in rəhbərliyində dəyişiklik olub. Ədnan Əhmədzadə “SOCAR Trading”in icraçı sədri təyin edilib. Ə.Əhmədzadə buna qədər “SOCAR Trading”in İdarə Heyətinin üzvü idi və uzun illər şirkətin idarə olunmasında aktiv iştirak edirdi. Emil Bayramlı “SOCAR Trading”in maliyyə direktoru, Məryəm Almaszadə isə şirkətin İcraçı Direktoru təyin edilib.

Arzu Əzimov ''SOCAR Trading''də fəaliyyətini davam etdirir və onun yeni vəzifəsi yaxın vaxtlarda elan ediləcək.

30 May 2018

SOCAR və “Statoil” (Equinor) şirkətləri yeni kəşfiyyat və hasilat layihələri haqqında iki saziş imzaladılar

+

Mayın 30-da Azərbaycan Respublikası Dövlət Neft Şirkəti ilə Norveçin Equinor qrupunun bir hissəsi olan Statoil Azərbaycan şirkəti “Xəzər dənizinin Azərbaycan sektorunda “Qarabağ” neft yatağının işlənməsi ilə əlaqədar risk xidməti” (RXS) və “Xəzər dənizinin Azərbaycan sektorunda Əşrəfi-Dan Ulduzu-Aypara sahəsinin kəşfiyyatı, işlənməsi və hasilatın pay bölgüsü” (HPBS) haqqında sazişləri imzaladılar. Sazişləri SOCAR-ın prezidenti Rövnəq Abdullayev və Equinor qrupun yataqların kəşfiyyatı üzrə icraçı vitse-prezidenti Tim Dodson imzalamışlar. “Qarabağ” yatağında kəşfiyyat qazması cari ildə planlaşdırılır. Hazırkı Risk Xidməti Sazişinə əsasən, yataqda platformanın quraşdırılması və ilk hasilat 2021-ci ildə nəzərdə tutulur. HPBS çərçivəsində isə seysmik kəşfiyyat işlərinin yerinə yetirilməsi və ilk kəşfiyyat quyusunun qazılması nəzərdə tutulur. Layihələrin icrası üçün Statoil və SOCAR tərəfindən 50-50 birgə əməliyyat şirkəti yaradılacaq.

SOCAR prezidenti Rövnəq Abdullayev demişdir: “Biz bu gün SOCAR və Equinor arasında əməkdaşlığın yeni mərhələsinə qədəm qoyuruq. 25 illik təcrübəyə əsaslanan tərəfdaşlıq bağları yeni layihələrimizin maksimum səmərə ilə birgə işlənməsi üçün münbit zəmin yaradır. Bu gün imzalanan sazişlər Azərbaycanda neft hasilatının stabilləşməsi və ölkədə təbii qaza artan tələbatın qarşılanması baxımından, o cümlədən emal sənayesinin xammal ilə təchiz edilməsi üçün mühüm əhəmiyyət kəsb edir.”

Equinor qrupunun prezidenti və baş icraçı direktoru Eldar Saetre demişdir: “Bu gün imzalanan sazişlər regionda növbəti məntiqli addımımızdır. Bu, bizim məhsuldar hövzələrdə mövqeyimizi möhkəmləndirəcək və inkişaf istiqamətlərini müəyyənləşdirəcək. Yataqlar bizim yaxşı tanıdığımız bir hövzədə AÇG yatağının yaxınlığında yerləşir. Biz SOCAR ilə birlikdə bu yeni kəşfiyyat layihələri üzrə işləməyi planlaşdırırıq.”

Xatıqladaq ki, “Qarabağ” perspektivli dəniz strukturu kimi 1959-cu ildə seysmik kəşfiyyat işləri nəticəsində aşkar edilmiş, 1984-cü ildə dəqiqləşdirilmiş və 1997-1998-ci illərdə kəşfiyyat qazması nəticəsində neft-qazlılığı təsdiqlənmişdir. Yataq Bakıdan şərq istiqamətində 120 kilometr aralı, açıq dənizin 150-200 metr dərinliyində yerləşir. “Dan Ulduzu” və “Əşrəfi” perspektiv strukturları Xəzər dənizində, Bakıdan şimal-şərqə doğru 100-110 kilometr məsafədə yerləşir. Burada dənizin dərinliyi 80-180 metrdir. “Aypara” sahəsi Bakı şəhərindən 90 kilometr şimal-şərqdə, açıq dənizdə yerləşir, 1980-ci ildə seysmik kəşfiyyat işləri nəticəsində aşkar edilmişdir.



Redaktorlar üçün qeyd:

-SOCAR və Statoil (Equinor) 1992-ci ildən bir sıra mühüm layihələrdə, o cümlədən Azəri-Çıraq və dərinsulu Günəşli (AÇG) neft yatağının işlənilməsi layihəsində əməkdaşlıq etmişlər. AÇG layihəsində SOCAR-ın payı 25%, Statoil Azərbaycan şirkətinin payı isə 7,27%-dir.

-AÇG neftinin əsas ixrac marşrutu olan Bakı-Tbilisi-Ceyhan (BTC) layihəsində Statoil Azərbaycan-ın 8,71%, SOCAR-ın törəmə şirkəti olan AzBTC-nin isə 25% payı vardır.

-Statoil Azərbaycan bu yaxınlarda adı dəyişmiş Equinor Qrupun (keçmiş Statoil Qrup) bir hissəsidir və adı dəyişdirilib Equinor Azərbaycan olacaq.

30 May 2018

SOCAR və Yaponiyanın JOGMEC korporasiyası əməkdaşlıq haqqında memorandum imzalamışlar

+

Mayın 30-da Bakıda 25-ci Xəzər Beynəlxalq Neft və Qaz Sərgi-Konfransı çərçivəsində SOCAR və Yaponiya İqtisadiyyat, Ticarət və Sənaye Nazirliyinin Neft, Qaz və Metallurgiya Korporasiyası (JOGMEC) arasında Əməkdaşlıq Memorandumu imzalanmışdır. Geoloji və geofiziki tədqiqatlar, texniki əməkdaşlıq və insan resurslarının inkişafı sahəsində əməkdaşlığa dair Memorandumu SOCAR-ın prezidenti Rövnəq Abdullayev və JOGMEC prezidenti Tetsuhiro Hosono imzalamışlar.

Azərbaycanın neft-qaz layihələri Yaponiya şirkətlərinin daim diqqət mərkəzindədir. 20 ildən artıqdır ki, Azərbaycanın yeni neft stretagiyası çərçivəsində SOCAR və Yaponiyanın İTOCHU, eləcə də İNPEX şirkətləri arasında qarşılıqlı maraqlara əsaslanan səmərəli əməkdaşlıq həyata keçirilir. Yaponiya Milli Neft Korporasiyasının (JNOC) davamçısı olan Yaponiya Neft, Qaz və Metallurgiya Korporasiyasının (JOGMEC) rəhbər nümayəndələri bir necə dəfə Azərbaycana səfər etmiş, SOCAR və ITOCHU şirkətləri tərəfindən Pirallahı yatağında layların neftveriminin artırılması üzrə aparılan birgə tədqiqat işinin gedişi ilə tanış olmuşlar və gələcək əməkdaşlığa dair təkliflər də buradan yaranmışdır.

Qeyd: Yaponiya Neft, Qaz və Metallurgiya Korporasiyası (JOCMEG) 2004-cü ilin fevralında Yaponiya Milli Neft Korporasiyası (JNOC) və Yaponiya Metallurgiya-Mədən Agentliyinin (MMAJ) birləşməsi nəticəsində yaranaraq, həmin qurumların müvafiq vəzifələrini öz üzərinə götürmüşdür. Yaponiyanın İqtisadiyyat, Ticarət və Sənaye Nazirliyinin (Ministry of Economy, Trade and İndustry - METİ) təkibində olan JOGMEC Yaponiya Milli Neft Korporasiyasının davamçısı kimi, hökumət adından ITOCHU, İNPEX və s. şirkətlərin xaricdə neft-qaz sahəsində fəaliyyətlərinə texniki və maliyyə dəstəyi verir.

21 May 2018

Çinin İxrac Kredit Sığorta Korporasiyası (SINOSURE) Azərbaycan və SOCAR ilə əməkdaşlığa maraq göstərir

+

Mayın 21-də SOCAR prezidenti Rövnəq Abdullayev Çinin İxrac Kredit Sığorta Korporasiyasının (SINOSURE) icraçı direktoru Vanq Yinin başçılıq etdiyi nümayəndə heyətini qəbul etmişdir. Görüşdə SOCAR-ın kəşfiyyat, hasilat, nəql, emal və kimya sahələrində həyata keçirdiyi layihələrdə Çin şirkətlərinin iştirakı üçün mövcud imkanlar barədə müzakirə aparılmışdır. Çin şirkətlərini Azərbaycan iqtisadiyyatına investisiyalar yatırmağa cəlb etmək üçün SINOSURE və SOCAR arasında məlumat mübadiləsinin təşkili və bu istiqamətdə ortaq səylərin gücləndirilməsinin zərurəti vurğulanmış, habelə SOCAR-ın fəaliyyət göstərdiyi region ölkələrində də Çin şirkətləri üçün investisiya imkanları müzakirə olunmuşdur.

SINOSURE ixrac kreditlərinin sığortalanması sahəsində ixtisaslaşan yeganə Çin sığorta şirkətidir. O öz fəaliyyətini 2001-ci ilin dekabr ayında başlamışdır. Mənzil-qərargahı Pekində yerləşir. Sinosure ölkə miqyasında xidmət şəbəkəsi formalaşdırmışdır. Son illərdə 187,2 milyard dollar həcmində investisiya və 141,4 milyard dollar həcmində orta və uzunmüddətli ixrac krediti sığortalamışdır. Sinosure hazırda dünya üzrə 85 min müştəriyə xidmət göstərir.

15 May 2018

SOCAR-ın Təlim, Tədris və Sertifikatlaşdırma İdarəsi 100 mininci sertifikatı təqdim etdi

+

Mayın 15-də SOCAR-ın Təlim, Tədris və Sertifikatlaşdırma İdarəsi tərəfindən ayrı-ayrı peşələr və ixtisaslar üzrə tədris olunan təlim kurslarında verilən 100 mininci Sertifikatın dinləyiciyə təqdim edilməsi mərasimi keçirilmişdir. SOCAR-ın 100 mininci peşə təlimi sertifikatı “Müasir elektron ölçü vasitələrinin ölçü qovşaqlarının və standartlarının tətbiqi” kursunu müvəffəqiyyətlə bitirən “Azneft” İstehsalat Birliyinin 28 May Neft-Qaz Çıxarma İdarəsinin əməkdaşı Aftil Əliyevə təqdim edilmişdir.

TTSİ-nin rəisi Fuad Süleymanov İdarənin fəaliyyəti ilə bağlı təqdimatla çıxış etmiş, keçilən yola nəzər yetirmiş, SOCAR-ın beynəlxalq standartlara cavab verən və region üzrə öz sahələrində unikallığı ilə seçilən müxtəlif peşə təlimi kurslarından bəhs etmişdir. “Azneft” İstehsalat Birliyinin baş mühəndisi Balamirzə Ağarəhimov texnologiyanın sürətli inkişafı dövründə müxtəlif ixtisaslar üzrə peşəkar fəhlə və mütəxəssislərin kurslara cəlb edilməsinin biznes inkişafı üçün olan zərurətini vurğulamışdır.

SOCAR-ın Kadr, rejim və informasiya texnologiyaları üzrə vitse-prezidenti Xalik Məmmədov tədbirdəki çıxışında demişdir: “Azərbaycan Respublikasının Prezidenti cənab İlham Əliyevin “Neft kapitalı insan kapitalına çevrilməlidir” təlimatına uyğun olaraq, SOCAR bu istiqamətdə öz geniş miqyaslı layihələrini davam etdirir. Dayanıqlı inkişafımızın əsas şərtlərindən biri də beynəlxalq standartlara cavab verən yüksək səviyyəli peşə təliminin təşkilidir. 13 il ərzində SOCAR-ın Təlim, Tədris və Sertifikatlaşdırma İdarəsi üzərinə düşən vəzifəni layiqincə yerinə yetirmişdir. Ölkə iqtisadiyyatına dəyərli töhfə verərək təlim mərkəzlərində 100 minə qədər peşəkar fəhlə kadrının hazırlanmasına, mühəndis texniki işçilərin ixtisaslarının artırılmasına nail olunmuşdur. 100 mininci Sertifikatın Xalq Cümhuriyyətinin 100 illiyi ərəfəsində “28 May” NQÇİ-nin əməkdaşına qismət olması isə həm də rəmzi məna daşıyır”.

“Azneft” İstehsalat Birliyinin 28 May NQÇİ-nin İstehsalat proseslərinin avtomatlaşdırılması Xidmət sahəsinin böyük mühəndisi 100 mininci Sertifikatın sahibi Aftil Əliyev demişdir: “SOCAR-da peşə təlimləri beynəlxalq standartlar əsasında keçirilir. Təlim mərkəzlərində ən müasir avadanlıqlardan istifadə olunur, peşəkarlar burada müasir bilik və səriştələrə yiyələnə bilirlər. Burada verilən sertifikatlar həm yerli, həm də xarici şirkətlərdə fəaliyyət göstərmək üçün bir vəsilədir. Belə bir şərait yaratdığına görə Azərbaycan Respublikasının Prezidenti möhtərəm İlham Əliyev cənablarına və SOCAR rəhbərliyinə dərin təşəkkürümü bildirirəm”.

2005-ci ildən fəaliyyət göstərən Təlim, Tədris və Sertifikatlaşdırma İdarəsi 5 təlim mərkəzindən, qaynaq sexlərindən, fiziki və mexaniki sınaq laboratoriyalarından ibarətdir. İdarənin mütəxəssisləri tərəfindən dəniz neftçilərinə beynəlxalq müqavilələr əsasında beynəlxalq standartlara və beynəlxalq dəniz konvensiyalarının tələblərinə uyğun təlimlər keçirilir. Həmçinin SOCAR-ın strukturuna daxil olan müəssisələrdə standartların tətbiqi və onlara nəzarət TTSİ-nin fəaliyyət sferasına daxildir.

10 May 2018

SOCAR rəhbərliyi Ulu öndər Heydər Əliyevin məzarını ziyarət etmişdir

+

Mayın 10-da Azərbaycan Respublikası Dövlət Neft Şirkətinin rəhbərliyi və onun çoxminli kollektivinin təmsilçiləri xalqımızın Ümummilli lideri Heydər Əliyevin anadan olmasının 95-ci ildönümü ilə əlaqədar Ulu öndərin Fəxri xiyabandakı məzarını ziyarət etmişlər. Şirkət nümayəndələri suveren Azərbaycan dövlətinin qurucusu və memarı, müstəqilliyimizin əbədiliyinin qarantına çevrilmiş, iqtisadiyyatımızın inkişafında, milli dövlətçiliyimizin möhkəmləndirilməsində müstəsna rol oynamış enerji strategiyasının banisi Ulu öndər Heydər Əliyevin unudulmaz xatirəsinə Azərbaycan neftçilərinin bəslədiyi dərin hörmət və ehtiramın ifadəsi olaraq Ümummilli liderin məzarı üzərinə tər çiçəklər düzmüş, onun ruhuna dualar oxumuş, abidəsi qarşısında baş əymişlər.

7 May 2018

Dünya Bankının GGFR təşkilatı Azərbaycanın təcrübəsini öyrənmək və dünyaya yaymaq istəyir

+

Dünya Bankının “Səmt Qazının Yandırılmasının Azaldılması üzrə Qlobal Tərəfdaşlıq” (GGFR) Təşkilatının illik toplantısı bu il mayın 7-də SOCAR-ın təşəbbüsü ilə, ilk dəfə olaraq, Azərbaycanda keçirilir. Toplantı SOCAR ilə Dünya Bankının GGFR Təşkilatı arasında qlobal istiləşmə və iqlim dəyişmələrinin təsirinin azaldılması istiqamətində həyata keçirilən əməkdaşlığın 10-cu ildönümünə təsadüf edir. SOCAR, BP və Dünya Bankının GGFR Təşkilatının birgə layihəsi nəticəsində son illərdə atmosferə atılan ümumi 4,5 milyard kubmetrə qədər səmt qazı platformalarda tutularaq ölkənin qaz təsərrüfatına verilmişdir.

7-8 may tarixlərində keçiriləcək tədbir zamanı şamda yandırılan qazın azaldılması istiqamətində Azərbaycanın təcrübəsinin öyrənilməsi, əldə olunan yüksək nailiyyətlərlə yaxından tanışlıq və bu təcrübənin xaricdə tətbiqi məsələlərinin mümkünlüyünün müzakirəsi məqsədilə SOCAR-ın istehsalat ərazilərinə səfər təşkil olunacaqdır. Tədbirin işində dünyanın 18 ölkəsindən və 13 beynəlxalq neft-qaz şirkətindən 50 nəfər rəhbər şəxs və mütəxəssis nümayəndə təmsil olunur. Tədbirin açılış mərasimində SOCAR-ın prezidenti Rövnəq Abdullayev, Azərbaycan Respublikasının Ekologiya və Təbii Sərvətlər naziri Muxtar Babayev, SOCAR-ın ekologiya üzrə vitse-prezidenti Rəfiqə Hüseynzadə, Dünya Bankının ölkə üzrə meneceri Nəvid Nəqvi, GGFR Təşkilatının rəhbəri Kristofer Qilbert, BMT-nin Azərbaycandakı Rezident Əlaqələndiricisi və BMT-nin İnkişaf Proqramı üzrə Rezident nümayəndəsi Qulam İsakzai və BP, Chevron, Exxon, “Norwegian Petroleum”, “Shell”, “Statoil”, “Total” və digər bu kimi beynəlxalq neft-qaz şirkətlərinin yüksək vəzifəli nümayəndələri iştirak edir.

Toplantıda çıxış edən SOCAR-ın prezidenti Rövnəq Abdullayev demişdir: “Bu gün bəşəriyyət bir neçə qlobal xarakterli problemlə üzləşib ki, bunlardan biri də ətraf mühitin qorunmasıdır. Ekoloji problemlər bir ölkənin sərhədləri ilə məhdudlaşmır, bütün yer kürəsini əhatə edir. Bu səbəbdən SOCAR bu istiqamətdə əsas çalışmaları məhz beynəlxalq təşkilatlarla birgə həyata keçirir. Səmt qazının yandırılmasının azaldılması ətraf mühitin qorunmasına töhfə verməklə yanaşı, həm də bu dəyərli resursu ölkə iqtisadiyyatına qazandırır, iqtisadi dayanıqlığa xidmət edir.”

Dünya Bankının ölkə üzrə meneceri Nəvid Nəqvi demişdir: “Hazırda 75-dən çox hökumət, neft şirkəti və inkişaf institutları 2030-cu ilədək səmt qazının yandırılmasının sıfıra endirilməsi təşəbbüsünə qoşulmuşdur. Azərbaycan və SOCAR-la artıq 10 ildir ki, karbon emissiyasının azaldılması istiqamətində səmərəli əməkdaşlıq edirik. Hesab edirəm ki, SOCAR-ın bu sahədə uğurlu təcrübəsi dünyamızın üzləşdiyi qlobal ekoloji problemin aradan qaldırılmasına mühüm töhfədir və bütün neft və qaz şirkətləri üçün nümunə ola bilər.”

Dünya Bankı 2002-ci ildə bir sıra hökumət və şirkətlərlə birlikdə Qlobal Səmt Qazı Yandırılmasının Azaldılması üzrə tərəfdaşlığa start vermişdir. GGFR və Dünya Bankının səylərinin əsas məqsədi qaz ehtiyatlarını ölkələrin davamlı inkişafına və iqtisadiyyatlarının şaxələndirilməsinə yönləndirməkdir. Qeyd etmək lazımdır ki, hər il dünyanın neft hasil olunan yerlərində 150 milyard kubmetr səmt qazı yandırılır. Bu, atmosferə 300 milyon tondan çox CO2 qazının emissiyasına səbəb olur. Əgər qlobal miqyasda yandırılan bütün qaz elektrik enerjisi istehsalına sərf olunsaydı, 750 milyard kilovat elektrik enerjisi yaranardı ki, bu da Afrika qitəsinin bir illik tələbatına bərabərdir.